النهارده هنتكلم شوية عن تجاعيد الوجه وازاي نعالجها من الوجه.
ايه هي تجاعيد الوجه :
الاول عشان نكون عارفين انها اما تجاعيد ثابته اما تجاعيد متحركه او بمعني ان تكون التجاعيد بتبان مع الحركه زي الى بتكون فى الجبهه وحولين العين دي اسمها تجاعيد متحركه يعني لا تظهر الا بحركه معينه زي الناس الى بتكشر او الى بترمش حولين عينيها لما بتضحك او تبتسم او لما بتستغرب وترفع حواجبها لفوق كل دي اسمها تجاعيد متحركه, اما التجاعيد الثابته هي الى بتكون ظاهره بدون حركه ودي بتكون احياناً اما تحت العين اما بين الانف والفم او فى جوانب الوجه ودي اسمها التجاعيد الثابته.
ايه هي اسباب التجاعيد :
السبب الرئيسي للتجاعيد هي الجاذبيه الأرضيه يعني مرور السن وطبعاً مع مرور السن بتظهر التجاعيد بشكل ملحوظ وبيحصل معاه كمان إذابه او قله فى الدهون الموجوده فى الوجه وبيبدأ الوجه يفقد توازنه مع الجاذبيه الأرضيه يعني بطريقه مبسطه ان احنا جسمنا بيتشد لتحت واحنا بنقاوم لفوق والمقاومه دي بتكون عن طريق قوة الجلد نفسه, طول ما الجلد قوي ويقدر يتحمل ويقدر يشد جسمه لفوق ويقاوم الجاذبيه الأرضيه بيكون وشنا مشدود وكويس, وطول ما الجاذبيه تتغلب علينا تبتدي التجاعيد تظهر فى الوجه بسبب ضعف قوة الجسم على مقاومة الجاذبيه الأرضيه.
كمان فيه بيظهر تجاعيد فى السن المبكر ان بيبقي فيه شوية جفاف فى الوجه, او شوية مشاكل في الوجه, او بيكون فيه ضعف شديد, وبتبان بطريقه ملحوظه جداً للي بيعملوا رجيم قاسي وهنا اول حاجه بتظهر التجاعيد طبعاً فى الوجه ويبدأ الوجه يكون ضعيف جداً وده سبب بيتكرر كتير يخلي الناس تقول انا مش هعمل رجيم.
إزالة تجاعيد الوجه / شد الوجه :
له طرق كتير جداً هنبدأها ونفسرها لكن لازم نعرف ان الجراحه هي الفكره الآخيره, احنا بنبدأ بحجات بسيطه جداً ونبدأ نتصاعد ونزود العلاج وآخر تفكيرنا الجراحه وبإذن الله ماحدش يحتاجها.
اول حاجه لازم ولابد إزازتين ميه ( 2 لتر ميه ) يومياً وطبق السلطه الخضراء وزي محنا عارفين ان دول بيدوا لوجهنا نضاره وطبعاً احنا مش محتاجين حاجه زياده مش محتاجين ادويه, ميه وسلطه خضراء دي كفايه اوي انها تحافظ علي نضارة الوجه, ممكن برده نستخدم معاه كريمات مرطبه للوجه ونبعد دايماً عن الشمس فى اوقات الظهر ( من 11ص الي 3 م ) دي الاوقات الي بتكون فى الشمس سعات مؤذيه نتيجة وجود الأشعه فوق البنفسجيه الي بتأثر على الوجه, ندخل بقي على طرق العلاج.
طرق علاج تجاعيد الوجه :
طيب احنا ماعملناش الكلام ده وإبتدت التجاعيد تظهر هنبدأ نعالجها على حسب ان كانت بسيطه نعالجها بطرق بسيطه او علاج اقوي إذا كانت التجاعيد أقوي, واول علاج التجاعيد البسيطه هي التقشير بأحماض الفواكه ده من الحجات الي بتشيل الخطوط او التجاعيد الضعيفه او الصغيره, ونقدر كمان نستخدم الليزر المجزء, لكن المهم اننا مش بس نتخلص من التجاعيد لا كمان لازم نحافظ على عدم ظهور التجاعيد بإستخدام كريمات الترطيب وزي ما قلنا الميه والسلطه, وبعد كدا نحدد هل التجاعيد دي قلت او رفعت او ماعدش ليها اثر الا بسيط ولا لازالت كما هي وفى الحاله دي بنبدأ نعالجها على حسب نوعيتها, فى حالة ان التجاعيد متحركه بنبدأ نستخدم البوتوكس ودي عامل مهم جداً لإنها بتوقف العضله الى بتظهر التجاعيد سواء كانت التجاعيد دي حوالين العين او فى الجبهه, طبعاً مادة البوتوكس ليها استخدامات كتير فى مجال الطب ولكن هي مشهوره جداً فى إزالة تجاعيد الوجه, او نزيل التجاعيد الثابته الي بتكون حولين الفم ولو عاوزين نكبر الخدود او الشفاه بنبدأ نستخدم مادة الفيلرز ودي مادة من المواد المالئه وانواعها كتير وبتكون فيها ترابط جزيئات بإستخدام مادة زي الكالسيوم مثلاً او ماده زي الصوديوم بيزودو التماسك وكل ما ازداد تماسك الجزيئات كل ما طالت الفتره.
ملاحظه هامه :
لا تلجأ لأي ادويه او علاج إلا بعد تجربه لا تقل عن شهرين بإستخدام المرطبات والميه والسلطه الخضراء.
